ਸਿਡਨੀ ਅਤੇ ਨਾਰਥ ਸਾਨਿਚ ਵਿੱਚ ਸਖ਼ਤੀ: 4 ਦਿਨਾਂ ਦੌਰਾਨ 7 ਨਸ਼ੇੜੀ ਡਰਾਈਵਰ ਕਾਬੂ, ਪੁਲਿਸ ਨੇ ਜਾਰੀ ਕੀਤੀ ਚਿਤਾਵਨੀ

ਸਿਡਨੀ/ਨਾਰਥ ਸਾਨਿਚ: ਕੈਨੇਡਾ ਦੇ ਸਿਡਨੀ ਅਤੇ ਨਾਰਥ ਸਾਨਿਚ ਇਲਾਕੇ ਵਿੱਚ ਰੋਡ ਸੇਫਟੀ ਨੂੰ ਯਕੀਨੀ ਬਣਾਉਣ ਲਈ ਆਰਸੀਐਮਪੀ ਵੱਲੋਂ ਚਲਾਈ ਗਈ ਵਿਸ਼ੇਸ਼ ਮੁਹਿੰਮ ਦੌਰਾਨ ਵੱਡੀ ਕਾਰਵਾਈ ਸਾਹਮਣੇ ਆਈ ਹੈ। 16 ਜੁਲਾਈ ਤੋਂ 19 ਜੁਲਾਈ, 2026 ਦਰਮਿਆਨ ਸਿਰਫ਼ ਚਾਰ ਦਿਨਾਂ ਦੇ ਵਕਫ਼ੇ ਵਿੱਚ ਪੁਲਿਸ ਨੇ ਸੜਕਾਂ ਤੋਂ 7 ਨਸ਼ੇੜੀ ਡਰਾਈਵਰਾਂ ਨੂੰ ਕਾਬੂ ਕਰਕੇ ਹਿਰਾਸਤ ਵਿੱਚ ਲਿਆ ਹੈ। ਪੁਲਿਸ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਇਸ ਜਾਂਚ ਦੌਰਾਨ ਵੱਖ-ਵੱਖ ਮਾਮਲੇ ਸਾਹਮਣੇ ਆਏ
90-ਦਿਨਾਂ ਦੀ ਪਾਬੰਦੀ: ਚਾਰ ਡਰਾਈਵਰਾਂ ਨੂੰ ਤੁਰੰਤ ਰੋਡਸਾਈਡ ਪ੍ਰੋਹਿਬਸ਼ਨ ਜਾਰੀ ਕੀਤੇ ਗਏ, ਜਿਸ ਦੇ ਤਹਿਤ ਉਨ੍ਹਾਂ ਦੇ ਡਰਾਈਵਿੰਗ ਲਾਇਸੈਂਸ 90 ਦਿਨਾਂ ਲਈ ਮੁਅੱਤਲ ਕਰ ਦਿੱਤੇ ਗਏ ਹਨ ਅਤੇ ਉਨ੍ਹਾਂ ਦੇ ਵਾਹਨ 30 ਦਿਨਾਂ ਲਈ ਜ਼ਬਤ ਕਰ ਲਏ ਗਏ ਹਨ। ਡਰਾਈਵਿੰਗ ਦੇ ਪਿਛੋਕੜ ਅਤੇ ਹੋਰ ਗੰਭੀਰ ਹਾਲਤਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਇੱਕ ਡਰਾਈਵਰ  ਖ਼ਿਲਾਫ਼ ਕ੍ਰਿਮੀਨਲ ਕੋਡ ਤਹਿਤ ਨਸ਼ਾ ਕਰਕੇ ਵਾਹਨ ਚਲਾਉਣ ਦਾ ਅਪਰਾਧਿਕ ਮਾਮਲਾ ਦਰਜ ਕੀਤਾ ਗਿਆ ਹੈ। ਦੋ ਹੋਰ ਡਰਾਈਵਰਾਂ ਨੂੰ ਥੋੜ੍ਹੇ ਸਮੇਂ ਲਈ ਡਰਾਈਵਿੰਗ ਪਾਬੰਦੀਆਂ ਦਿੱਤੀਆਂ ਗਈਆਂ ਹਨ।
ਸਟਾਫ਼ ਸਾਰਜੈਂਟ ਕੌਨਲੇ ਨੇ ਖ਼ੁਲਾਸਾ ਕੀਤਾ ਹੈ ਕਿ ਸਾਲ 2025 ਦੇ ਮੁਕਾਬਲੇ ਸਾਲ 2026 ਵਿੱਚ ਇਸੇ ਸਮੇਂ ਦੌਰਾਨ ਸੜਕਾਂ ਤੋਂ ਨਸ਼ੇੜੀ ਡਰਾਈਵਰਾਂ ਨੂੰ ਹਟਾਉਣ ਦੇ ਮਾਮਲਿਆਂ ਵਿੱਚ 74 ਫ਼ੀਸਦੀ ਦਾ ਭਾਰੀ ਵਾਧਾ ਦੇਖਿਆ ਗਿਆ ਹੈ। ਇਹ ਵਾਧਾ ਸਾਡੇ ਟਰੈਫਿਕ ਇਨਫੋਰਸਮੈਂਟ ’ਤੇ ਲਗਾਤਾਰ ਧਿਆਨ ਅਤੇ ਸੜਕ ਸੁਰੱਖਿਆ ਪ੍ਰਤੀ ਸਾਡੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ, ਸਟਾਫ਼ ਸਾਰਜੈਂਟ ਕੌਨਲੇ ਨੇ ਕਿਹਾ। ਸ਼ਰਾਬ ਜਾਂ ਨਸ਼ਾ ਕਰਕੇ ਵਾਹਨ ਚਲਾਉਣਾ ਪੂਰੀ ਤਰ੍ਹਾਂ ਰੋਕਿਆ ਜਾ ਸਕਦਾ ਹੈ, ਅਤੇ ਸਾਡੇ ਅਧਿਕਾਰੀ ਉਨ੍ਹਾਂ ਡਰਾਈਵਰਾਂ ਨੂੰ ਨਿਸ਼ਾਨਾ ਬਣਾਉਣਾ ਜਾਰੀ ਰੱਖਣਗੇ ਜੋ ਖੁਦ ਨੂੰ ਅਤੇ ਦੂਜਿਆਂ ਨੂੰ ਖ਼ਤਰੇ ਵਿੱਚ ਪਾਉਂਦੇ ਹਨ।
ਪੁਲਿਸ ਨੇ ਜਨਤਾ ਨੂੰ ਯਾਦ ਕਰਵਾਇਆ ਹੈ ਕਿ ਨਸ਼ੇ ਵਿੱਚ ਗੱਡੀ ਚਲਾਉਣ ਦੇ ਨਤੀਜੇ ਬਹੁਤ ਗੰਭੀਰ ਹੋ ਸਕਦੇ ਹਨ, ਜਿਸ ਵਿੱਚ ਲਾਇਸੈਂਸ ਮੁਅੱਤਲੀ, ਵਾਹਨ ਜ਼ਬਤ ਹੋਣਾ, ਭਾਰੀ ਜੁਰਮਾਨੇ, ਅਪਰਾਧਿਕ ਦੋਸ਼, ਵਧੇ ਹੋਏ ਬੀਮਾ ਖ਼ਰਚੇ ਅਤੇ ਕ੍ਰਿਮੀਨਲ ਰਿਕਾਰਡ ਸ਼ਾਮਲ ਹਨ। ਨਾਗਰਿਕਾਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਸ਼ਰਾਬ ਪੀਣ ਤੋਂ ਪਹਿਲਾਂ ਸੁਰੱਖਿਅਤ ਢੰਗ ਨਾਲ ਘਰ ਪਹੁੰਚਣ ਦੀ ਯੋਜਨਾ ਬਣਾਓ, ਜਿਵੇਂ ਕਿ ਕਿਸੇ ਸੋਬਰ (ਨਸ਼ਾ ਨਾ ਕਰਨ ਵਾਲੇ) ਡਰਾਈਵਰ ਦਾ ਪ੍ਰਬੰਧ ਕਰਨਾ, ਟੈਕਸੀ ਜਾਂ ਰਾਈਡਸ਼ੇਅਰ ਦੀ ਵਰਤੋਂ ਕਰਨਾ, ਜਨਤਕ ਆਵਾਜਾਈ ਦੀ ਵਰਤੋਂ ਕਰਨਾ, ਰਾਤ ਰੁਕਣ ਲਈ ਕਿਸੇ ਸੁਰੱਖਿਅਤ ਥਾਂ ਦਾ ਪ੍ਰਬੰਧ ਕਰਨਾ ਜੇਕਰ ਕਿਸੇ ਨੂੰ ਵੀ ਲੱਗਦਾ ਹੈ ਕਿ ਕੋਈ ਡਰਾਈਵਰ ਨਸ਼ੇ ਦੀ ਹਾਲਤ ਵਿੱਚ ਗੱਡੀ ਚਲਾ ਰਿਹਾ ਹੈ, ਤਾਂ ਸੁਰੱਖਿਅਤ ਹੋਣ ’ਤੇ ਤੁਰੰਤ 9-1-1 ’ਤੇ ਫ਼ੋਨ ਕਰਨ ਦੀ ਅਪੀਲ ਕੀਤੀ ਗਈ ਹੈ।