175,000 ਵਰਗ ਫੁੱਟ ਦੇ ਨਵੇਂ ਕੇਂਦਰ ਵਿੱਚ ਸਵਿਮਿੰਗ ਪੂਲ, ਜਿਮਨੇਜ਼ੀਅਮ, ਫਿਟਨੈੱਸ ਸੈਂਟਰ, ਆਰਟਸ ਸਪੇਸ ਅਤੇ 40,000 ਵਰਗ ਫੁੱਟ ਦੀ ਨਵੀਂ ਲਾਇਬ੍ਰੇਰੀ ਹੋਵੇਗੀ
ਸਰੀ, ਬੀ ਸੀ (ਖੰਡੌਲੀ) — ਸਰੀ ਦੇ ਨਿਊਟਨ ਇਲਾਕੇ ਵਿੱਚ ਨਵੇਂ ਕਮਿਊਨਿਟੀ ਸੈਂਟਰ ਦਾ ਨਿਰਮਾਣ ਸ਼ੁਰੂ ਹੋ ਗਿਆ ਹੈ। ਸਿਟੀ ਆਫ ਸਰੀ ਵੱਲੋਂ ਜਾਰੀ 15 ਸਤੰਬਰ 2026 ਦੀ ਮੀਡੀਆ ਰਿਲੀਜ਼ ਮੁਤਾਬਕ ਇਹ $310.6 ਮਿਲੀਅਨ ਦਾ ਪ੍ਰੋਜੈਕਟ ਸਰੀ ਦੇ ਇਤਿਹਾਸ ਦੇ ਵੱਡੇ ਕੈਪੀਟਲ ਪ੍ਰੋਜੈਕਟਾਂ ਵਿੱਚੋਂ ਇੱਕ ਹੈ।
ਨਿਰਮਾਣ ਸਾਈਟ ’ਤੇ ਪੁਰਾਣੇ ਅਤੇ ਹੁਣ ਵਰਤੋਂ ਵਿੱਚ ਨਾ ਰਹੇ ਢਾਂਚੇ ਨੂੰ ਹਟਾਉਣ, ਜ਼ਮੀਨ ਨੂੰ ਪੱਧਰਾ ਕਰਨ ਅਤੇ ਵਾਧੂ ਭੂ-ਤਕਨੀਕੀ ਜਾਂਚ ਦਾ ਕੰਮ ਚੱਲ ਰਿਹਾ ਹੈ।
ਨਵਾਂ ਨਿਊਟਨ ਕਮਿਊਨਿਟੀ ਸੈਂਟਰ ਲਗਭਗ 175,000 ਵਰਗ ਫੁੱਟ ਵਿੱਚ ਬਣਾਇਆ ਜਾਵੇਗਾ। ਇਸ ਦਾ ਮਕਸਦ ਨਿਊਟਨ ਦੇ ਵਸਨੀਕਾਂ ਲਈ ਮਨੋਰੰਜਨ, ਸਿਹਤਮੰਦ ਜੀਵਨਸ਼ੈਲੀ, ਸੱਭਿਆਚਾਰ ਅਤੇ ਲਾਇਬ੍ਰੇਰੀ ਸੇਵਾਵਾਂ ਨੂੰ ਇੱਕੋ ਥਾਂ ’ਤੇ ਇਕੱਠਾ ਕਰਨਾ ਹੈ।
ਪ੍ਰੋਜੈਕਟ ਵਿੱਚ 50 ਮੀਟਰ ਦਾ ਲੈਪ ਪੂਲ, ਲੀਜ਼ਰ ਪੂਲ, ਹੌਟ ਟੱਬ ਅਤੇ ਸੌਨਾ ਸ਼ਾਮਲ ਹੋਣਗੇ। ਇਸ ਤੋਂ ਇਲਾਵਾ ਦੋ ਜਿਮਨੇਜ਼ੀਅਮ, ਫਿਟਨੈੱਸ ਸੈਂਟਰ, ਮਲਟੀ-ਪਰਪਜ਼ ਅਤੇ ਆਰਟਸ ਸਪੇਸ, ਬੱਚਿਆਂ ਦੀ ਦੇਖਭਾਲ ਲਈ ਥਾਵਾਂ ਅਤੇ ਇੱਕ ਨਵੀਂ 40,000 ਵਰਗ ਫੁੱਟ ਦੀ ਲਾਇਬ੍ਰੇਰੀ ਵੀ ਬਣਾਈ ਜਾਵੇਗੀ।
ਨਵੀਂ ਲਾਇਬ੍ਰੇਰੀ ਮੌਜੂਦਾ ਨਿਊਟਨ ਬ੍ਰਾਂਚ ਦੇ ਮੁਕਾਬਲੇ ਦੋ ਗੁਣਾ ਤੋਂ ਵੀ ਵੱਧ ਵੱਡੀ ਹੋਵੇਗੀ।
ਸਰੀ ਦੀ ਮੇਅਰ ਬਰੈਂਡਾ ਲੌਕ ਨੇ ਇਸ ਪ੍ਰੋਜੈਕਟ ਨੂੰ ਨਿਊਟਨ ਲਈ ਇੱਕ “gamechanger” ਕਰਾਰ ਦਿੰਦਿਆਂ ਕਿਹਾ ਕਿ ਨਿਊਟਨ ਵਰਗੇ ਵੱਡੇ ਅਤੇ ਵਿਭਿੰਨ ਭਾਈਚਾਰੇ ਨੂੰ ਉਸ ਦੇ ਆਕਾਰ, ਵਿਭਿੰਨਤਾ ਅਤੇ ਸਮਰੱਥਾ ਦੇ ਅਨੁਕੂਲ ਕਮਿਊਨਿਟੀ ਹੱਬ ਦੀ ਲੋੜ ਹੈ।
ਨਿਰਮਾਣ ਦੀ ਸ਼ੁਰੂਆਤ ਨਵੇਂ Newton Community Centre Road ਦੇ ਸਫਲਤਾਪੂਰਵਕ ਮੁਕੰਮਲ ਹੋਣ ਤੋਂ ਬਾਅਦ ਹੋਈ ਹੈ। ਇਹ ਸੜਕ King George Boulevard ਤੋਂ ਆਉਣ ਵਾਲੇ ਪੈਦਲ ਯਾਤਰੀਆਂ, ਸਾਈਕਲ ਸਵਾਰਾਂ ਅਤੇ ਵਾਹਨ ਚਾਲਕਾਂ ਲਈ ਭਵਿੱਖ ਦੇ ਕਮਿਊਨਿਟੀ ਸੈਂਟਰ ਤੱਕ ਪਹੁੰਚ ਨੂੰ ਬਿਹਤਰ ਬਣਾਏਗੀ। ਸਿਟੀ ਮੁਤਾਬਕ ਇਹ ਸੜਕ ਆਉਣ ਵਾਲੇ ਹਫ਼ਤਿਆਂ ਵਿੱਚ ਖੋਲ੍ਹੇ ਜਾਣ ਦੀ ਉਮੀਦ ਹੈ।
ਨਵਾਂ ਕਮਿਊਨਿਟੀ ਸੈਂਟਰ King George Boulevard ਦੇ ਪੂਰਬੀ ਪਾਸੇ, Newton Seniors Centre ਦੇ ਨਾਲ ਸਥਿਤ ਹੋਵੇਗਾ।
ਸਿਟੀ ਆਫ ਸਰੀ ਮੁਤਾਬਕ ਇਹ ਪ੍ਰੋਜੈਕਟ ਨਿਊਟਨ ਟਾਊਨ ਸੈਂਟਰ ਨੂੰ ਲੰਬੇ ਸਮੇਂ ਲਈ ਮੁੜ ਵਿਕਸਤ ਅਤੇ ਮਜ਼ਬੂਤ ਕਰਨ ਦੀ ਯੋਜਨਾ ਦਾ ਇੱਕ ਮਹੱਤਵਪੂਰਨ ਹਿੱਸਾ ਹੈ।
ਨਵੇਂ ਨਿਊਟਨ ਕਮਿਊਨਿਟੀ ਸੈਂਟਰ ਦੇ ਬਸੰਤ 2030 ਵਿੱਚ ਖੁੱਲ੍ਹਣ ਦੀ ਉਮੀਦ ਹੈ। ਇਹ ਪ੍ਰੋਜੈਕਟ ਨਿਊਟਨ ਦੇ ਵਸਨੀਕਾਂ ਲਈ ਮਨੋਰੰਜਨ, ਖੇਡਾਂ, ਫਿਟਨੈੱਸ, ਸੱਭਿਆਚਾਰ, ਬੱਚਿਆਂ ਦੀਆਂ ਸੇਵਾਵਾਂ ਅਤੇ ਲਾਇਬ੍ਰੇਰੀ ਸਹੂਲਤਾਂ ਵਿੱਚ ਵੱਡਾ ਵਾਧਾ ਕਰੇਗਾ।
