ਸੇਵਾਮੁਕਤ ਪੁਲਿਸ ਡੌਗ ’ਹਾਲਾ’ ਦਾ ਦੇਹਾਂਤ 7 ਸਾਲਾਂ ਦੀ ਸ਼ਾਨਦਾਰ ਸੇਵਾ ਅਤੇ ਬਹਾਦਰੀ ਲਈ ਹਮੇਸ਼ਾ ਯਾਦ ਰੱਖਿਆ ਜਾਵੇਗਾ

ਵੈਸਟ ਸ਼ੋਰ, ਬ੍ਰਿਟਿਸ਼ ਕੋਲੰਬੀਆ : ਵੈਸਟ ਸ਼ੋਰ ਆਰ.ਸੀ.ਐਮ.ਪੀ ਵੱਲੋਂ ਬਹੁਤ ਹੀ ਭਰੇ ਮਨ ਨਾਲ ਇਹ ਦੁਖਦਾਈ ਖ਼ਬਰ ਸਾਂਝੀ ਕੀਤੀ ਗਈ ਹੈ ਕਿ ਉਨ੍ਹਾਂ ਦੀ ਸਾਬਕਾ ਸਾਥੀ ਅਤੇ ਸੇਵਾਮੁਕਤ ਪੁਲਿਸ ਡੌਗ ’ਹਾਲਾ’ ਦਾ ਇੱਕ ਅਚਾਨਕ ਬਿਮਾਰੀ ਕਾਰਨ ਜੁਲਾਈ 2026 ਵਿੱਚ ਦੇਹਾਂਤ ਹੋ ਗਿਆ ਹੈ। 10 ਸਾਲਾ ਹਾਲਾ, ਜੋ ਕਿ ਇੱਕ ਬਹੁਤ ਹੀ ਖੂਬਸੂਰਤ ਅਤੇ ਬਹਾਦਰ ਜਰਮਨ ਸ਼ੈਫਰਡ ਸੀ, ਨੇ ਆਪਣੀ ਜ਼ਿੰਦਗੀ ਦੇ 7 ਸਾਲ ਕੈਮਲੂਪਸ ਅਤੇ ਵੈਸਟ ਸ਼ੋਰ ਦੇ ਭਾਈਚਾਰਿਆਂ ਦੀ ਸੁਰੱਖਿਆ ਵਿੱਚ ਸਮਰਪਿਤ ਕੀਤੇ। ਸ਼ਾਨਦਾਰ ਪੁਲਿਸ ਕਰੀਅਰ ਅਤੇ ਮੁਹਾਰਤ
ਆਪਣੇ ਕਾਰਜਕਾਲ ਦੌਰਾਨ, ਹਾਲਾ ਨੇ ਆਪਣੇ ਹੈਂਡਲਰ, ਕਾਰਪੋਰਲ ਡੇਵ ਲੁਈਸ ਦੇ ਨਾਲ ਮਿਲ ਕੇ ਸੈਂਕੜੇ 9-1-1 ਐਮਰਜੈਂਸੀ ਕਾਲਾਂ ਦਾ ਜਵਾਬ ਦਿੱਤਾ। ਹਾਲਾ ਨੂੰ ਕਈ ਖਾਸ ਅਤੇ ਨਾਜ਼ੁਕ ਕੰਮਾਂ ਵਿੱਚ ਉੱਚ ਪੱਧਰੀ ਸਿਖਲਾਈ ਪ੍ਰਾਪਤ ਸੀ, ਜਿਨ੍ਹਾਂ ਵਿੱਚ ਸ਼ਾਮਲ ਸਨ ਸੁਰਾਗ ਲੱਭਣਾ, ਅਪਰਾਧਿਕ ਸਬੂਤਾਂ ਦੀ ਭਾਲ ਕਰਨਾ , ਵਿਸਫੋਟਕ ਸਮੱਗਰੀ ਦਾ ਪਤਾ ਲਗਾਉਣਾ ਹਨ। ਇਸ ਤੋਂ ਇਲਾਵਾ, ਉਸਨੇ ਆਰ.ਸੀ.ਐਮ.ਪੀ ਦੀ ’ਐਮਰਜੈਂਸੀ ਰਿਸਪਾਂਸ ਟੀਮ’ ਦੇ ਨਾਲ ਮੋਢੇ ਨਾਲ ਮੋਢਾ ਜੋੜ ਕੇ ਕੰਮ ਕੀਤਾ। ਖਾਸ ਕਰਕੇ, ਗੁੰਮ ਹੋਏ ਵਿਅਕਤੀਆਂ ਦੀ ਭਾਲ ਕਰਨ ਵਿੱਚ ਉਸਦੀ ਮੁਹਾਰਤ ਦਾ ਕੋਈ ਸਾਨੀ ਨਹੀਂ ਸੀ।
ਸੰਘਣੇ ਜੰਗਲ ਵਿੱਚ ਬੱਚੇ ਦੀ ਜਾਨ ਬਚਾਉਣ ਵਾਲੀ ਅਹਿਮ ਘਟਨਾ
ਹਾਲਾ ਦੀਆਂ ਕਮਾਲ ਦੀਆਂ ਯੋਗਤਾਵਾਂ ਨੂੰ ਦਰਸਾਉਂਦੀ ਇੱਕ ਘਟਨਾ ਅੱਜ ਵੀ ਵਿਭਾਗ ਦੇ ਜ਼ਹਿਨ ਵਿੱਚ ਤਾਜ਼ਾ ਹੈ। ਇੱਕ ਵਾਰ ਸੜਕ ਕਿਨਾਰੇ ਰੁਕੇ ਇੱਕ ਪਰਿਵਾਰ ਦਾ ਛੋਟਾ ਬੱਚਾ ਗਲਤੀ ਨਾਲ ਗੱਡੀ ਤੋਂ ਦੂਰ ਚਲਾ ਗਿਆ ਅਤੇ ਇੱਕ ਸੰਘਣੇ ਜੰਗਲ ਵਿੱਚ ਗੁੰਮ ਹੋ ਗਿਆ। ਅਜਿਹੀ ਨਾਜ਼ੁਕ ਘੜੀ ਵਿੱਚ, ਹਾਲਾ ਅਤੇ ਕਾਰਪੋਰਲ ਡੇਵ ਲੁਈਸ ਨੇ ਬਿਨਾਂ ਕੋਈ ਸਮਾਂ ਗਵਾਏ ਜੰਗਲ ਵਿੱਚ ਭਾਲ ਸ਼ੁਰੂ ਕਰ ਦਿੱਤੀ। ਆਪਣੀ ਸੁੰਘਣ ਦੀ ਕਮਾਲ ਸ਼ਕਤੀ ਅਤੇ ਸਿਖਲਾਈ ਸਦਕਾ, ਹਾਲਾ ਨੇ ਜਲਦੀ ਹੀ ਬੱਚੇ ਨੂੰ ਸੁਰੱਖਿਅਤ ਲੱਭ ਲਿਆ ਅਤੇ ਉਸਨੂੰ ਡਰੇ ਹੋਏ ਪਰਿਵਾਰ ਨਾਲ ਮਿਲਾਇਆ। ਉਨ੍ਹਾਂ ਦੀ ਇਸ ਫੁਰਤੀ ਵਾਲੀ ਕਾਰਵਾਈ ਨੇ ਇੱਕ ਬਹੁਤ ਹੀ ਭਿਆਨਕ ਸਥਿਤੀ ਨੂੰ ਇੱਕ ਖੁਸ਼ਗਵਾਰ ਅੰਤ ਵਿੱਚ ਬਦਲ ਦਿੱਤਾ ਸੀ।
2023 ਵਿੱਚ ਨਵੀਂ ਸ਼ੁਰੂਆਤ: ਮਾਨਸਿਕ ਸਿਹਤ ਪ੍ਰੋਗਰਾਮ ਵਿੱਚ ਯੋਗਦਾਨ ਸਾਲ 2023 ਵਿੱਚ ਫਰੰਟਲਾਈਨ ਡਿਊਟੀ ਤੋਂ ਸੇਵਾਮੁਕਤ ਹੋਣ ਤੋਂ ਬਾਅਦ, ਹਾਲਾ ਅਤੇ ਕਾਰਪੋਰਲ ਲੁਈਸ ਨੇ ’ਆਰ.ਸੀ.ਐਮ.ਪੀ ਨੈਸ਼ਨਲ ਰੀਇੰਟੀਗ੍ਰੇਸ਼ਨ ਪ੍ਰੋਗਰਾਮ’ ਵਿੱਚ ਆਪਣੀਆਂ ਸੇਵਾਵਾਂ ਦੇਣੀਆਂ ਸ਼ੁਰੂ ਕਰ ਦਿੱਤੀਆਂ। ਇੱਥੇ ਉਨ੍ਹਾਂ ਦਾ ਮਕਸਦ ਹੋਰ ਵੀ ਵੱਡਾ ਸੀ—ਉਨ੍ਹਾਂ ਆਰ.ਸੀ.ਐਮ.ਪੀ ਮੁਲਾਜ਼ਮਾਂ ਦੀ ਮਦਦ ਕਰਨਾ ਜੋ ਡਿਊਟੀ ਦੌਰਾਨ ਕਿਸੇ ਵੱਡੇ ਸਦਮੇ ਜਾਂ ਭਿਆਨਕ ਘਟਨਾਵਾਂ ਦਾ ਸ਼ਿਕਾਰ ਹੋਏ ਸਨ। ਹਾਲਾ ਨੇ ਆਪਣੀ ਮੌਜੂਦਗੀ ਨਾਲ ਅਜਿਹੇ ਕਰਮਚਾਰੀਆਂ ਦੀ ਮਾਨਸਿਕ ਸਿਹਤ ਨੂੰ ਸੁਧਾਰਨ ਅਤੇ ਉਨ੍ਹਾਂ ਨੂੰ ਦੁਬਾਰਾ ਕੰਮ ’ਤੇ ਪਰਤਣ ਵਿੱਚ ਵੱਡਾ ਯੋਗਦਾਨ ਪਾਇਆ। ਵਿਭਾਗ ਦੇ ਮੁਲਾਜ਼ਮਾਂ ਦਾ ਕਹਿਣਾ ਹੈ ਕਿ ਹਾਲਾ ਜਿਸ ਵੀ ਕਮਰੇ ਵਿੱਚ ਜਾਂਦੀ ਸੀ, ਉੱਥੇ ਖੁਸ਼ੀ ਅਤੇ ਸਕਾਰਾਤਮਕ ਊਰਜਾ ਭਰ ਦਿੰਦੀ ਸੀ।
ਸੇਵਾਮੁਕਤੀ ਤੋਂ ਬਾਅਦ ’ਨੈੱਡਸ ਵਿਸ਼’ ਦਾ ਸਹਿਯੋਗ
ਹੋਰਾਂ ਸੇਵਾਮੁਕਤ ਪੁਲਿਸ ਕੁੱਤਿਆਂ ਵਾਂਗ, ਹਾਲਾ ਨੂੰ ਵੀ ਡਿਊਟੀ ਛੱਡਣ ਤੋਂ ਬਾਅਦ ਉਮਰ ਵਧਣ ਕਾਰਨ ਲਗਾਤਾਰ ਮੈਡੀਕਲ ਦੇਖਭਾਲ ਦੀ ਲੋੜ ਸੀ। ਉਸਦੀ ਇਹ ਦੇਖਭਾਲ ਕੈਨੇਡੀਅਨ ਚੈਰਿਟੀ ’ਨੈੱਡਸ ਵਿਸ਼’ ਦੀ ਬਦੌਲਤ ਸੰਭਵ ਹੋ ਸਕੀ। ਇਹ ਇੱਕ ਅਜਿਹੀ ਰਜਿਸਟਰਡ ਸੰਸਥਾ ਹੈ ਜੋ ਸੇਵਾਮੁਕਤ ਲਾਅ ਇਨਫੋਰਸਮੈਂਟ ਅਤੇ ਕੈਨੇਡੀਅਨ ਆਰਮਡ ਫੋਰਸਿਜ਼ ਦੇ ਕੁੱਤਿਆਂ ੀ ਡਾਕਟਰੀ ਅਤੇ ਵਿੱਤੀ ਸਹਾਇਤਾ ਲਈ ਕੰਮ ਕਰਦੀ ਹੈ ਤਾਂ ਜੋ ਸੇਵਾਮੁਕਤੀ ਤੋਂ ਬਾਅਦ ਉਨ੍ਹਾਂ ਦਾ ਜੀਵਨ ਪੱਧਰ ਵਧੀਆ ਰਹਿ ਸਕੇ। ਵੈਸਟ ਸ਼ੋਰ ਆਰ.ਸੀ.ਐਮ.ਪੀ ਨੇ ਹਾਲਾ ਦੇ ਆਖਰੀ ਸਾਲਾਂ ਦੌਰਾਨ ਉਸਦੀ ਬਿਹਤਰੀਨ ਦੇਖਭਾਲ ਕਰਨ ਲਈ ’ਨੈੱਡਸ ਵਿਸ਼’ ਦਾ ਵਿਸ਼ੇਸ਼ ਤੌਰ ’ਤੇ ਧੰਨਵਾਦ ਕੀਤਾ ਹੈ।